مشتاق محمد

٭22 نومبر1943ء پاکستان کے نامور ٹیسٹ کرکٹر مشتاق محمد کی تاریخ پیدائش ہے۔
مشتاق محمد جونا گڑھ(بھارت) میں پیدا ہوئے تھے۔ ان کے دو بڑے بھائی وزیر محمد اور حنیف محمد اور ایک چھوٹے بھائی صادق محمد ٹیسٹ کرکٹ میں پاکستان کی نمائندگی کرچکے ہیں۔ مشتاق محمد نے اپنا پہلا ٹیسٹ میچ 26مارچ 1959ء کوویسٹ انڈیز کے خلاف کھیلا۔ اس وقت ان کی عمر صرف 15 سال 124 دن تھی، یوں انہیں ٹیسٹ کرکٹ میں سب سے کم عمر کھلاڑی ہونے کا اعزاز حاصل ہوا۔ ان کا یہ ریکارڈ 1996ء تک ناقابل شکست رہا۔
مشتاق محمد نے مجموعی طور پر 57 ٹیسٹ میچوں میں حصہ لیا، جس میں انہوں نے دس سنچریوں کی مدد سے مجموعی طور پر 3643رنز اسکور کیے۔ اس کے علاوہ انہوں نے ٹیسٹ میچز میں 79 وکٹیں بھی حاصل کیں۔ مشتاق محمد نے دس ایک روزہ میچ بھی کھیلے تاہم وہ ایک روزہ میچ میں کوئی سنچری اسکور کرنے میںکامیاب نہ ہوسکے۔ مشتاق محمد نے 1976ء میں پاکستان کی کرکٹ ٹیم کی قیادت سنبھالی۔انہوں نے مجموعی طور پر 19 ٹیسٹ میچوں میں پاکستان کی قیادت کی جس میں 8 ٹیسٹ میچوں میں انہیں کامیابی حاصل ہوئی، 4 ٹیسٹ میچوں میں شکست کا سامنا کرنا پڑا جبکہ 5 ٹیسٹ میچ ہار جیت کے فیصلے کے بغیر ختم ہوا۔
1963ء میں انہیں کرکٹ کی مشہور کتاب وزڈن نے سال کے پانچ بہترین کھلاڑیوں میں شمار کیا تھا ۔ وہ فضل محمود کے بعد یہ اعزاز حاصل کرنے والے دوسرے پاکستانی کھلاڑی تھے۔ اسی برس انہیں حکومت پاکستان نے بھی صدارتی تمغہ برائے حسن کارکردگی عطا کیا تھا۔