عادل صلاح الدین پاکستان کے نامور ڈاک ٹکٹ ڈیزائنر عادل صلاح الدین 1944ء میں دہلی میں پیدا ہوئے۔ 1962ء میں لاہور کے مشہور تعلیمی ادارے نیشنل کالج آف آرٹس میں داخل ہوئے اور وہاں سے تعلیم حاصل کرنے کے  بعد 1967ء میں پاکستان سیکیورٹی پرنٹنگ کارپوریشن سے منسلک ہوئے۔ انھوں نے پاکستان کے علاوہ بہت سے دوسرے ممالک کے ڈاک ٹکٹ بھی ڈیزائن کیے۔ ان کے ڈیزائن کردہ ڈاک ٹکٹوں کی تعداد ایک ہزار سے زیادہ ہے۔ ان کی خدمات کے اعتراف کے طور پر حکومت پاکستان نے انھیں 14 اگست 1987ء کو صدارتی تمغہ برائے حسن کارکردگی اور 14 اگست 2009ء کو ستارہ امتیاز کے اعزازات سے سرفراز کیا۔

امیر عدنان پاکستان کے نامور فیشن ڈیزائنر انھوں نے 1990ء میں اپنے کام کا آغاز کیا اور بہت جلد پاکستان کے صف اول کے فیشن ڈیزائنر بن گئے۔  وہ شیروانی ڈیزائن کرنے میں اختصاص رکھتے ہیں اور انھوں نے اس متروک ہوتے ہوئے لباس کو فیشن بنا دیا ہے۔ حکومت پاکستان نے انہیں 14 اگست 2005ء کو صدارتی تمغہ برائے حسن کارکردگی عطا کیا تھا۔

امین گل جی پاکستان کے مشہور مجسمہ ساز امین گل جی 1960ء میں کراچی میں پیدا ہوئے۔ ان کے والد اسماعیل گل جی پاکستان کے نامور مصوروں میں شمار ہوتے تھے۔ اسماعیل گل جی کی خواہش تھی کہ امین گل جی ایک بینکار بنیں۔ چنانچہ امین گل جی نے امریکہ سے معاشیات کی اعلیٰ تعلیم حاصل کی۔ اس تعلیم کے دوران ان کی طبیعت فنون لطیفہ کی جانب مائل ہوئی۔ انھوں نے اسلامی فن و ثقافت کے موضوع پر مقالہ تحریر کیا اور پھر جلد ہی مجسمہ سازی کے میدان میں قدم رکھ دیا۔ ان کی مجسمہ سازی کا آغاز جیولری کے چھوٹے چھوٹے فن پاروں کی تخلیق سے ہوا۔ اب ان کا شمار پاکستان کے نامور مجسمہ سازو ںمیں ہوتا ہے۔ ان کے فن کے اعتراف میں حکومت پاکستان نے انھیں 14 اگست 2005 ء کو صدارتی تمغہ برائے حسن کارکردگی عطا کیا تھا۔

 مسرت مصباح پاکستان کی میک اپ انڈسٹری کی ممتاز شخصیت مسرت مصباح 25 نومبر 1959ء کو کراچی میں پیدا ہوئیں۔ انھوں نے سینٹ جوزف کالج کراچی سے گریجویشن کیا اور 1980ء کی دہائی میں کراچی میں ڈپلیکس کے نام سے اپنا بیوٹی پارلر قائم کیا۔ اب اس بیوٹی پارلر کی شاخیں ملک کے دوسرے حصوں میں بھی کام کر رہی ہیں۔ مسرت مصباح نے تیزاب سے جھلسی ہوئی خواتن کی بحالی میں بھی اہم کردار ادا کیا۔ انھوں نے ایک ایسا میک اپ برانڈ بھی متعارف کروایا ہے جو پاکستان میں اپنی نوعیت کا پہلا تصدیق شدہ حلال میک اپ ہے جس کی تیاری میں کسی بھی مضر صحت اور حرام جانور کے اجزا کو شامل نہیں کیا گیا ہے۔ ان کے فن کے اعتراف میں حکومت پاکستان نے انھیں 14 اگست 2009ء کو صدارتی تمغہ برائے حسن کارکردگی عطا کیا تھا۔

رابعہ زبیری پاکستان کی نامور مصورہ اور مجسمہ ساز رابعہ زبیری 1940ء میں غیر منقسم ہندوستان میں پیدا ہوئیں۔ 1964ء میں انھوں نے اپنی بہن ہاجرہ زبیری کی معیت میں مینا آرٹ اسکول کے نام سے ایک ادارہ قائم کیا  جسے 1970ء میں کراچی اسکول آف آرٹ میں تبدیل کردیا گیا۔ رابعہ زبیری کے فن پاروں کی متعدد نمائشیں منعقد ہو چکی ہیں۔ ان کے فن کے اعتراف میں حکومت پاکستان نے انھیں 14 اگست 2009 ء کو صدارتی تمغہ برائے حسن کارکردگی عطا کیا تھا ۔

عبدالکریم سولنگی سندھ کے ایک نہایت با صلاحیت فنکار عبدالکریم سولنگی ساکت اور متحرک دونوں قسم کے ماڈل بنانے کے ماہر ہیں۔ وہ اپنے ماڈلز کے ذریعے بڑی خوبصورتی کے ساتھ سندھ کی ثقافت کی عکاسی کرتے ہیں۔ حکومت پاکستان نے ان کی خدمات کے اعتراف میں انھیں 14 اگست 2014 ء کو صدارتی تمغہ برائے حسن کارکردگی عطا کیا تھا ۔